بعد التفاعل مع المقال لي تنشر أمس الخميس في قضية النصبة الإلكترونية “الكبيرة”، اللي تعرضوا ليها عدد كبير من المغاربة من مختلف الفئات العمرية و من كِلا الجنسين و التي بلغت قيمتها نصف مليون دولار ( 500 مليون سنتيم تقريبا) معطيات حصرية وجديدة توصل بها موقع “آش24” من مصادر عديدة عندها إتصال مباشر مع الحدث.
القصة غدي نرويوها بلسان أحد المتضررين بمبالغ كبيرة :” trafficbuck.com سمعت به أول مرة من قناة FT chan على اليوتوب الطريقة باش كانت كتهضر أو كيفاش قدامنا كتوري أرباحها أو النصيحة بأش من باقة نبداو ،شجعاتني خصوصا أنني شفت بالي الموقع كيخدم بالدولار أو عمليات السحب ديال لفلوس كدوز عبر بنك البايبال اللي موثوق منو و آمن و قانوني، دخلت لموقع trafficbuck.com كانتفقد أو كنقرا العرض اللي كتقدمو كل باقة ، إمكانية الشراء دايرين إما من الموقع أو عبر الوكلاء ،دخلت لصفحة الوكلاء لقيت عددهم كبير و كل دولة فيها وكيل واحد أو أكثر، المغرب حتى هو فيه جوج وكلاء بانو ليا، الأول سميتو (محمد.أ) و الثاني (أمين.ه) ؛ اتصلت بالوكيل الأول لي كيمثل trafficbuck.com بالمغرب ،(محمد.أ) الي بغيت نتعرف عليه أولاً حيت ماكنتش تايق بزاف فهاذ التجربة ؛ السيد حس بيا متيقش بيه قطعنا الإتصال وعاود هو اتصل بيا من خلال مكالمة مرئية عبر تطبيق واتساب عرفني بنفسو وقالي أنه كيسكن في مدينة سلا و أنه أستاذ مادة الرياضيات وأنو هو الوكيل ديال ترافيك باك فالمغرب و أنه دخل فلوس كثيرة مع هذ الشركة أو بالي الشركة موثوقة و أنه ميمكنش يكون هدشي نصب حيث غادي يجبد على راسو الصداع (…) ، السيد زعمني و خلا ناس آخرين شراو من عندو مسبقا، يتاصلو بيا و يعاودو ليا تجربتهم. قلت مع نفسي السيد هضر معايا مكالمة مرئية و (…) ميمكنش يكون كيتفلا خصوصا أن الموقع ناشر الصورة ديالو وناشر جميع المعلومات عليه و هو عندو السحب اليومي للأموال من الموقع ماشي بحال الناس الي ماشي وكلاء إذن كين كفاش نرجع حقي من عندو إلى وقع الأسوء ، المهم توكلت على الله و بديت العمل في موقع( ترافيك باك )، إشهارات كيدوزوا كنتفرج فيهم حتا كنكمل العدد المسموح ليا في اليوم من المشاهدات ، هذه العملية كانت كتاخد ليا يوميا من ساعة ونصف حتال ساعتين المهم العذاب خصك تفرج أو كل 12 ثانية كضغط على واحد الزر صغير باش دوز للإشهار الموالي، من بعد ولا واحد تطبيق روبوت كيعاون ولكن مكنتش كنبغي نفعلو ، مع ذاك العذاب فنفس الوقت فرحان حيت لفلوس اللي غناخد بالمقابل حلال تعبت عليهم ؛ كان الإتفاق مع الموقع أن السحب غادي يكون كل أسبوع. الأحد الماضي اللي كان مفروض ناخدوا فلوسنا تأجل حتال يوم الثلاثاء تفاجأنا ومرتحناش و ناض كلشي كيهضر مع الوكيل ( محمد)؛ السيد قال لينا كنوا هانيين راني هضرت معا مول الموقع أو قالوا يوم 24 غشت (الثلاثاء الماضي) غناخدو فلوسنا قلنا ماكين باس جآ اليوم الموعود حاولنا نسحبوا الفلوس الموقع كيعطي رسالة باالي كاين ضغط كبير فعمليات الآداء لذالك خاص 72 ساعة ، فنفس اليوم توصلنا برسالة نصية على المجموعة اللي ديرها الوكيل على تطبيق واتساب و كتحمل إسم أفضل الباقات أن الموقع نصب علينا أو باللي “غيعوضنا الله كاملين يا إخوان” (…) وبقا كيدعي المهم جميع الأدعية مفهوم منها فلوسنا مشاو و الموقع قالينا كبو الماء على كروشكم الأمر الي جاني عجيب أن الوكيل ديالنا قالنا بالي مشات ليه عشرة ملايين سنتيم أو بالي حتا هو ضاع بحالو بحال الناس الي ضاعو فباقات شراوها بالملايين ها مول 4 دلمليون ها مول 7و 5 ها مول 13 وزيد ،و العجيب أيضا أن السيد شرا هاد البقة يوم الإثنين أي يوم قبل عملية النصب أو شارك مع المجموعة فالواتساب صور و مقاطع فيديو باللي شرا لنفسو ولناس آخرين دوك الباقات ديال لملين ؛ هذا الوكيل كان ديما كيقولينا “رضو فلوسكم كاملة و من بعد استثمروا فلأرباح ووسعوا الإستثمار ديالكم الآنترنت مفيهش الثقة و الموقع ممكن شي نهار مايبقاش حضيو راسكم” نصائح من ذهب صراحة ،وباش نطبقوا القول ديالو خاص مدة شهر على كحد أقصى لكن الموقع مكملش هاذ المدة أو سد ، الأسئلة الي حيرتني كفاش السيد الي كان كيقول لينا ديك الهضرة مطبقهاش و دخل هوا بمبلغ 10 دلمليون ؟ و علاش بالضبط شراها بنهار الي قبل يوم النصبة؟ علاش مدارهاش شحال هادي خصوصا كان كيقول عندو لفلوس ؟ علاش كان واحد التشجيع كثير على شراء بعض الباقات بتصف الثمن خصوصا ديال 22$ اللي ولاو ب 100 درهم وفبعض الأحيان كتعطى كزكاة كيفما قال لينا أو كتعطى كهدية للناس لي دخلو عائلاتهم أو أصدقاءهم للموقع و قنعوهم يشريو ؟ ” و علاش هاذ التخويف من الأنترنت ما تقالش قبل منشريو الباقات حتى الطفرات عاد ولا التذكير بخطورة الأنترنت و (…) هاذ الكم من الأسئلة ضروني فراسي “.
نظرا لتشابه عدد من الروايات إخترنا شهادة أخرى تصب في نفس إتجاه الرواية السابقة : ” الوكيل (محمد .أ ) أول ماوقع المشكيل فالموقع حمل المسؤولية لصاحب الموقع لي قال “أنه كان حتاهو وكيل و سميتو محمد ماهر ” هذا الوكيل كيقولوا الناس أنه مصري عندو 23 عام تعلم البرمجة و إنشاء المواقع الإلكترونية في ماليزيا ، صدمة كبيرة جاتنا خصوصا أن الموقع كان كيحدد موقع المكتب ديالو فالمملكة المتحدة و أن صاحبه إنجليزي و الموقع غيبقا خدام لمدة طويلة ، المهم الواقعة تسببت فالكثير من اللغط خصوصا الناس اللي استثمروا بالملايين ؛ من بعد وصلاتنا أنباء أن الوكيل المغربي لي هو ( أمين) عوض الناس اللي شراو من عندو الباقات بنسبة 20٪ من المبلغ اللي استثمروا بيه وشي وحدين آخرين رفض يعوضهم، فعلنا نفس الشيء و مشينا عند الوكيل ديالنا اللي شرينا من عندو ( محمد) باش يعوضنا تاحنا ب 20٪ ، عطا لناس كثار فنفس يوم ديك النسبة أو ربما أكثر و سمحوا فالباقي أعتقد و ناس آخرين رفض يعطيهم إلى حين مرور ثلاثة أيام حيت صاحب الموقع قاليهم غنرجع الموقع و نخلص الناس وذلك ما لم يحدث فوجد نفسه مجبر بعطي ديك 20 % واخا بزاف الي خداوها قبلو و لكن ما سمحوش فالباقي 80 %، و آخرين مزال مرجع ليهم والو.
في لقاء حواري مباشر على تطبيق غوغل ميت عقدناه نحن المتضررون مع الوكيل ( محمد ) تؤكد عدة نساء من الضحايا ” أننا خلال الحوار مع طلبنا منوا بشكل ودي أن يطلعنا إن شاء على المبالغ المالية اللي عندو فحسابه البنكي، أنا كنت كنسمعوا كيقول معندي والو مكينش منين نعوضكم قلت صافي عفا الله عما سلف السيد بحالنا متضرر راه شرا باقة كبيرة و فلوسو تاهو مشاو كنت كنقول غتكون 0 درهم ولكن المفاجأة كانت أنه بان لينا باالي عندو مبلغ مالي كثر من 20000 ألف درهم وأنا مخديتش التعويض ديال 20% و المسألة الثانية شفنا جميع التحويلات المالية على الحساب البنكي ديالو اللي ورانا خلال المدة الي قال بدا فيها الخدمة مع الموقع و لي هي 15 يوم خلالها تجاوزات 23 مليون سنتيم. و بعد نهاية ذللك اللقاء تجمعو الضحايا فمجموعة حوارية على تطبيق محادثات أو عاودو لحساب بحيث طلبو من الكل يفصح على المبلغ المالي الي دفعو للوكيل باش يشري ليه الباقة ، الحسابات بينات أن الوكيل على الأقل غيكون روج مبلغ 37 مليون، منطلق خلا الكثير من المشاركين كيفكرو أن بزاف دناس الوكيل ديالنا كياخد نسبة مئوية على كل زبون شرا باقة جديدة من عندو و فعل رمز إحالة الوكيل (رمز الإحالة: هو رمز مكون من حروف و أرقام بموجبه يستفيد الزبون الجديد من مبلغ 5 $ ويستفيد الوكيل من نسبة مئوية عن ثمن الباقة تبتدئ النسبة من 5% إلى 25% بحسب ثمن كل باقة ) إذن هذه أرباح عندو يرجع لينا رؤوس أموالنا خصوصا ملي صارحنا أن ديك لباقة لي قال شرا ب 10 دلمليون مشراهاش بوحدوا داخلين معاه ناس آخرين إذن عندو ضرر قليل شوية الحمد لله أو فلوس الإحالة لي هو ربح بصفتو وكيل الموقع المعتمد في المغرب خاصو يضامن معنا، يحيد رأس المال باش بدا أول مرة مع الموقع ولي قال أنه بدا ب5000 د.رهم وخلال 3 أسابيع من العمل رجعها ب 30ألف درهم. .بعد طلب جميع الضحايا من الوكيل ( محمد) مرة أخرى يتعاود الإجتماع المرئي باش يدققوا معاه الحساب و يقتارحو عليه آراءهم الي ناقشوا ويطرحوا عليه أسئلتهم ، رفض هذا الأخير بحجة كاينين ناس ميقدرش يناقشهم حيت معندهمش “أدب الحوار” و أنه غدي يكتافي بنشر فيديو على صفحته على اليوتوب ، الشيء الي معجبش بزاف و عتابروه تهرب ؛ ساعات بعد ذلك و الفيديو نشرو الوكيل على قناة إسمها didida على اليوتيوب خلالها تبين أن الحسابات الي دارو الضحايا قريب شوية للنتيجة الي خرج بها الوكيل وهي 51,943$ وأنه من جهته سيرفع شكاية بصاحب الموقع ” محمد ماهر ” لأنه المسؤول عن الواقعة.
المصدر (https://www.xe.com/currencyconverter/convert/?Amount=51943&From=USD&To=MAD)
المصدر : ( youtube)
)tr
المصدر : (يوتيوب)
رابط الفيديو كاملا
https://www.youtube.com/watch?app=desktop&v=vNK7F5xPcjU&feature=youtu.be
بعد هذه التطوارت المتسارعة لهذه القضية التي يلفها الغموض من كل النواحي و”فشل” كل محاولات الضحايا للتواصل مع صاحب الموقع لإيجاد حلول مرضية، نادت أصوات متضررة من عملية النصب هذه بضرورة دخول المدير العام الأمن الوطني عبد اللطيف الحموشي و محمد الدخيسي مدير الشرطة القضائية بالمديرية العامة للأمن الوطني، ومدير مكتب الإنتربول على الخط ، لأن عملية النصب هذه تكتسي طابعا دوليا وأن مجموعة من الناس بداو كيسجلو شكايات ضد الوكيلين المغربيين باش تبان الحقائق المخفية ، جدير بالذكر أن الصحيفة الإلكترونية تحتفظ بتسجيلات مرئية و مسموعة و مقروءة حصل عليها من مصادره تدعم شهادات الضحايا الذين أدلوا بشهاداتهم في هذا المقال.
لعل الأيام المقبلة تحمل العديدة من الإجابات لأسئلة كثيرة “غامضة” : من هي الجهات اللي استولات على هذا المبلغ ؟ وشنوا الإنتماءات ديالها هل هي إرهابية أم عندها علاقات بشبكات إجرامية عالمية ؟ والسؤال الأهم هل ممكن ترجع الآموال لآصحابها ؟
أنا من أحد ضحايا هذا الموقع و أطالب بالعدالة أن تقوم بالواجب نحن لا ننسا القانون فوق الجميع أتمنى أن يأخذ حقنا لأن كل شيئ واضح كما وضحه زميلنا نحن لدينا كل شيئ بالبرهان .
نتمنى من العدالة أن تتخذ مجراها و انصاف الضحايا الكثيرة لهذه العملية الإحتيالية لأكل أموال الناس بالباطل
نعم تعرضنا لأكبر عملية نصب من طرف نصابين محترفين يستغلون فقر الناس لربح ولو القليل لسد القليل من الحجيات اليومية و ااكراء و الماء و الضو بعط ان حطمهم هدا الوباء العين ليتفأجئو مرة اخرى بي وباء في صفت انسان بعن ان جردهم من جميع ميملكون من الاموال و اصبحو تمام افلاس حقيقي . يجب على السلطات المغربية أن تتحرك و تضرب بيد من حديد كل من شارك في هذه العملية الفريدة من نوعها